ស្វាយរៀង ៖ រថយន្តធុនធំខ្នាតយក្សប្រភេទវ៉េអង១គ្រឿង លូចដឹកទំនិញធ្ងន់ខ្ពស់ បំរ៉ុងឆ្លងដែនទៅប្រទេសវៀតណាម ខណៈមកដល់កណ្តាលផ្លូវក៍ឡប់ផ្ងារជើងច្រងាងតែម្តង កាលពីវេលាម៉ោង៩និង១០នាទី កាលពីថ្ងៃទី១៣ ខែកញ្ញា ឆ្នាំ២០២៤ នៅលើកំណាត់ផ្លូវលំ ស្ថិតក្នុងភូមិព្រៃរបឹស ឃុំត្នោត ស្រុកកំពង់រោទិ៍ ខេត្ដស្វាយរៀង ។
សាក្សីនៅកន្លែងបានឲ្យដឹងថា រថយរថយន្ដក្រឡាប់នេះ ប្រភេទវ៉េអង ពាក់ស្លាកលេខកំពង់ស្ពឺ 3A-0499 ដឹកទំនិញខ្ពស់ហួសមាឌ លុះដល់ចំណុចកើតហេតុខាងលើ កាច់ចង្កូតខ្លាំងពេក ក៏ក្រឡាប់ផ្ងារជើងតែម្តង សំណាងល្អមិនបង្កឲ្យគ្រោះថ្នាក់ដល់អ្នកធ្វើដំណើរតាមដងផ្លូវឡើយ ។
ពលរដ្ឋក៍ដូចជាអ្នកធ្វើដំណើរតាមដងផ្លូវទៅធ្វើការងារក៏ដូចជាប្រកបមុខរបរផ្សេងៗបានលើកឡើងថា ប៉ុន្មានខែចុងក្រោយនេះ គេឃើញរថយន្តយីឌុបធុនធំៗ ប្រភេទវ៉េអង ដឹកទំនិញលើសទម្ងន់ ផ្ទុកទំនិញចាប់ពី៤០ទៅ៥០តោនធ្វើចរាចរណ៍លើផ្លូវកៅស៊ូ ឆ្លងកាត់ឃុំចំនួន០៤ គឺចេញពីផ្លូវជាតិលេខ១ ចំណុចភូមិដើដើពោធិ៍ ឃុំស្វាយតាយាន ស្រុកកំពង់រោទិ៍ ឆ្លងកាត់ឃុំខ្សែត្រ ឃុំសំឡី ឆ្ពោះទៅភូមិធ្លកថ្មីឃុំត្នោត ស្រុកកំពង់រោទិ៍ បង្កឲ្យបាក់ស្រុតផ្លូវក្រាលកៅស៊ូជាច្រើនកន្លែង ហើយបន្តទៅតាមផ្លូវលំជនបទ ឆ្លងកាត់ភូមិព្រៃរបឺស និងភូមិធ្លកថ្មី បង្កឲ្យបាក់ស្រុតក្លាយជារណ្តៅសំបុកមាន់ ពិបាកធ្វើដំណើរយ៉ាងខ្លាំង ដោយសារតែរថយន្តធុនយក្សទាំងនេះបំផ្លាញ ។
ក្នុងនោះដែរគេឃើញមានរថយន្តវៀត ណាមបានឆ្លងដែនពីប្រទេសវៀតណាមចូលមកក្នុងដីខ្មែរ ដើម្បីផ្ទេរទំនិញនៅក្នុងដីខ្មែរ ពេលថ្ងៃរហូតដល់វេលាម៉ោង៦និង៥០នាទីយប់ ទើបដឹកចូលទៅប្រទេសវៀតណាម ដោយគ្មានសមត្ថកិច្ចជំនាញណាចុះមកពិនិត្យនោះទេ ។
នៅចំណុចច្រករបៀងធ្លកថ្មីនេះ ឈ្មួញវៀតណាម តែងតែយករថយន្តឆ្លងដែនចូលមកដីខ្មែររៀងរាល់ថ្ងៃរង់ចាំឈ្មួញខ្មែរដឹកទំនិញមកផ្ទេរទំនិញដាក់រថយន្តវៀតណាម ដឹកឆ្លងដែនទៅប្រទេសវៀតណាម ។ ប្រភពបានប្រាប់ថា ទំនិញរួមមាន៖ស្ករស គ្រឿងអេឡិចត្រូនិច បារី ក្រណាត់គីប និងសំលៀកបំពាក់ ដែលគេសង្ស័យជាទំនិញគេចពន្ធ ដោយមិនឃើញមានសមត្ថកិច្ចជំនាញណាត្ត្រួតពិនិត្ទេ ។
ជារៀងរាល់ថ្ងៃគេឃើញមាន រថយន្តដឹកទំនិញធុនធំ ប្រភេទវ៉េអង ចំណុះចាប់ពី៤០តោនទៅ៥០តោន ធ្វើចរាចរណ៍នៅលើផ្លូវក្រាលកៅស៊ូ ដែលជាអំណោយរបស់សម្តេចតេជោហ៊ុន សែន ជាចំណងដៃជួនប្រជាពលរដ្ឋស្រុកកំពង់រោទិ៍ធ្វើដំណើរ និងផ្លូវលំដែលរាជរដ្ឋាភិបាលសាងសង់ សម្រាប់ឲ្យប្រជាពលរដ្ឋធ្វើដំណើរ ជាពិសេស មន្ត្រីសោធននិវត្ដន៍ធ្វើដំណើរទៅទីតាំងផ្ទះ១០០ខ្នង ដែលរាជរដ្ឋាភិបាលបានសាងសង់ជូនមន្ត្រីសោធននិវត្ដន៍ នៅតាមបណ្តោយព្រំដែន ភូមិធ្លកថ្មី ឃុំត្នោត ស្រុកកំពង់រោទិ៍និងភូមិតែងម៉ៅ ឃុំចន្ទ្រាស្រុកចន្ទ្រា បច្ចុប្បន្នបង្កឲ្យបាក់ស្រុតផ្លូវថ្នល់ខូចក្រហេងក្រហូងក្លាយជាសំបុកមាន់ ជាបណ្តើរៗហើយមកដល់ខែកញ្ញានេះ ។
ទាក់ទិនករណីនេះដែរ អង្គភាពសារព័ត៌មានយើងមិនទាន់អាចសុំការបំភ្លឺពីអាជ្ញាធរនិងសមត្ថកិច្ចពាក់ព័ន្ធណាមួយបាននៅឡើយទេ។
អង្គភាពសារព័ត៌មានយើងនិងរង់ចាំធ្វើការផ្សាយជាបន្តបន្ទាប់ប្រសិនបើមានការពន្យល់បកស្រាយពីអាជ្ញាធរនិងសមត្ថកិច្ចពាក់ព័ន្ធឬសមុីភាគីពាក់ព័ន្ធណាមួយរៀងរាល់ម៉ោងធ្វើការ ៕
